குறள் 816

பேதை பெருங்கெழீஇ நட்பின் அறிவுடையார்
ஏதின்மை கோடி உறும்.

மு.வரதராசனார் உரை:

அறிவில்லாதவனுடைய மிகப் பொருந்திய நட்பை விட அறிவுடையவரின் நட்பில்லாத தன்மை கோடி மடங்கு நன்மை தருவதாகும்.

பரிமேலழகர் உரை:

பேதை பெருங்கெழீஇ நட்பின் – அறிவிலானது மிகச் சிறந்த நட்பின்; அறிவுடையார் ஏதின்மை கோடி உறும் – அறிவுடையானது பகைமை கோடி மடங்கு நன்று. ( ‘கெழீஇய’ என்பதன் இறுதி நிலை விகாரத்தால் தொக்கது. பன்மை உயர்த்தற்கண் வந்தது. அறிவுடையான் பகைமை ஒருதீங்கும் பயவாமையாயினும், பேதை நட்பு எல்லாத் தீங்கும் பயத்தலானும், ‘கோடி உறும்’ என்றார். ‘பெருங்கழி நட்பு’என்று பாடம் ஓதுவாரும் உளர்.) .

உரை:

அறிவில்லாதவனிடம் நெருங்கிய நட்புக் கொண்டிருப்பதை விட, அறிவுடைய ஒருவரிடம் பகை கொண்டிருப்பது கோடி மடங்கு மேலானதாகும்.

சாலமன் பாப்பையா உரை:

அறிவற்றவனின் மிக நெருக்கமான நட்பைக் காட்டிலும் அறிவுடையார்களின் பகை, கோடி நன்மையாம்.

மணக்குடவர் உரை:

அறிவில்லாதார் மிகவும் கெழுமிய நட்பாகுமதனினும், அறிவுடையார் பகைமை கோடிமடங்கு மிக்க நன்மையை உண்டாக்கும். இது பேதைமையார் நட்புத் தீமை பயக்கு மென்றது.

Transliteration:

paedhai perungezheei natpin aRivutaiyaar
Edhinmai koati uRum

Translation:

Better ten million times incur the wise man’s hate,
Than form with foolish men a friendship intimate.

Explanation:

The hatred of the wise is ten-million times more profitable than the excessive intimacy of the fool.