குறள் 432

இவறலும் மாண்பிறந்த மானமும் மாணா
உவகையும் ஏதம் இறைக்கு.

மு.வரதராசனார் உரை:

பொருள் கொடாத தன்மையும் மாட்சியில்லாத மானமும், தகுதியற்ற மகிழ்ச்சியும் தலைவனாக இருப்பனுக்கு குற்றங்களாகும்.

பரிமேலழகர் உரை:

இவறலும் – வேண்டும்வழிப் பொருள் கொடாமையும்; மாண்பு இறந்த மானமும் – நன்மையின் நீங்கிய மானமும், மாணா உவகையும் – அளவிறந்த உவகையும், இறைக்கு ஏதம் – அரசனுக்குக் குற்றம்.
(மாட்சியான மானத்தின் நீக்குதற்கு ‘மாண்பு இறந்த மானம்’ என்றார். அஃதாவது, ‘அந்தணர் சான்றோர் அருந்தவத்தோர் தம் முன்னோர் தந்தை தாய் என்றிவரை(புறப். வெ. மா. பாடாண் -33) வணங்காமையும் முடிக்கப்படாதாயினும் கருதியது முடித்தே விடுதலும் முதலாயின. அளவிறந்த உவகையாவது, கழிகண்ணோட்டம், பிறரும், ‘சினனே காமம் கழிகண்ணோட்டம்’ என்றிவற்றை ‘அறந்தெரி திகிரிக்கு வழியடையாகும் தீது’ (பதிற்.22) என்றார். இவை இரண்டு பாட்டானும் குற்றங்களாவன இவை என்பது கூறப்பட்டது.).

உரை:

மனத்தில் பேராசை, மான உணர்வில் ஊனம், மாசுபடியும் செயல்களில் மகிழ்ச்சி ஆகியவை தலைமைக்குரிய தகுதிக்கே பெருங்கேடுகளாகும்.

சாலமன் பாப்பையா உரை:

நியாயமாகத் தேவைப்படுவோர்க்குத் தேவையானவற்றைக் கொடாதிருப்பது, பெரியோர் என்று தெரிந்தும் தம் பதவிப் பெருமை கருதி வணங்காதிருப்பது, தீயவற்றில் மகிழ்வது – இவை ஆட்சியாளர்க்குக் குற்றங்களாம்.

மணக்குடவர் உரை:

உலோபமும் நன்மையைக் கடந்த மானமும் நன்மையைத் தாரா மகிழ்ச்சியுமாகிய இம்மூன்றும் அரசர்க்குக் குற்றமாம். இது பொதுப்படக் கூறாது இறைக்கு என்றமையால் பெரும்பான்மையும் அரசர்க்கே வேண்டுமென்பது கூறிற்று.

திருக்குறளார் வீ. முனிசாமி உரை:

கொடுக்க வேண்டியவற்றிற்குப் பொருள் கெடாதிருத்தலும், நன்மையில் நீங்கிய மானமும், அளவுகடந்த உவகையும் அரசனுக்குக் குற்றங்களாகும்.

Transliteration:

ivaRalum maaNpiRandha maanamum maaNaa
uvakaiyum Edham iRaikku

Translation:

A niggard hand, o’erweening self-regard, and mirth
Unseemly, bring disgrace to men of kingly brith.

Explanation:

Avarice, undignified pride, and low pleasures are faults in a king.