குறள் 1092

கண்களவு கொள்ளும் சிறுநோக்கம் காமத்தில்
செம்பாகம் அன்று பெரிது.

மு.வரதராசனார் உரை:

கண்ணால் என்னை நோக்கிக் களவு கொள்கின்ற சுருங்கிய பார்வை காமத்தில் நேர்பாதி அன்று, அதைவிடப் பெரிய பகுதியாகும்.

பரிமேலழகர் உரை:

(இதுவும் அது.) கண் களவு கொள்ளும் சிறுநோக்கம் – இவள் கண்கள் யான் காணாமல் என்மேல் நோக்குகின்ற அருகிய நோக்கம்; காமத்தின் செம்பாகம் அன்று பெரிது – மெய்யுறு புணர்ச்சியின் ஒத்த பாதி அளவன்று; அதனினும் மிகும். (தான் நோக்கியவழி நாணி இறைஞ்சியும்,நோக்காவழி உற்று நோக்கியும் வருதலான், ‘களவுகொள்ளும்’ என்றும், அஃது உளப்பாடுள்வழி நிகழ்வதாகலின், இனிப் ‘புணர்தல் ஒருதலை’என்பான் ‘செம்பாகம் அன்று, பெரிது’ என்றும் கூறினான்.).

உரை:

கள்ளத்தனமான அந்தக் கடைக்கண் பார்வை, காம இன்பத்தின் பாதியளவைக் காட்டிலும் பெரிது!.

சாலமன் பாப்பையா உரை:

நான் பார்க்காதபோது, என்னைக் களவாக பார்க்கும் இவளின் சிறு பார்வை, காதலில் சரி பாதி அன்று அதற்கு மேலாம்.

மணக்குடவர் உரை:

என்கண்களைச் சோர்வுபார்த்துக் களவினால் நோக்குகின்ற சிறிய நோக்கம், வேண்டப்பட்ட பொருளிற் பாதியேயன்று; பெரிது. தலைமகள் தலைமகன் காணாமைநோக்குதலின் அது களவாயிற்று.

Transliteration:

kaNkaLavu koLLum siRunhoakkam kaamaththil
sempaakam andru peridhu

Translation:

The furtive glance, that gleams one instant bright,
Is more than half of love’s supreme delight.

Explanation:

A single stolen glance of her eyes is more than half the pleasure (of sexual embrace).