குறள் 317

 

எனைத்தானும் எஞ்ஞான்றும் யார்க்கும் மனத்தானாம்
மாணாசெய் யாமை தலை.

மு.வரதராசனார் உரை:

எவ்வளவு சிறியதாயினும் எக்காலத்திலும் எவரிடத்திலும் மனதால் எண்ணி உண்டாகின்ற துன்பச்செயலைச் செய்யாதிருத்தலே நல்லது.

பரிமேலழகர் உரை:

மனத்தான் ஆம் மாணா – மனத்தோடு உளவாகினற் இன்னாத செயல்களை; எஞ்ஞான்றும் யார்க்கும் எனைத்தானும் செய்யாமை தலை – எக்காலத்தும் யாவர்க்கும் சிறிதாயினும் செய்யாமை தலையாய அறம். (ஈண்டு மனத்தான் ஆகாத வழிப் பாவம் இல்லை என்பது பெற்றாம். ஆற்றலுண்டாய காலத்தும் ஆகாமையின். ‘எஞ்ஞான்றும்’ என்றும் எளியார்க்கும் ஆகாமையின் , ‘யார்க்கும்’ என்றும், செயல் சிறிதாயினும் பாவம் பெரிதாகலின், ‘எனைத்தானும்’ என்றும் கூறினார்.).

உரை:

எவ்வளவிலும், எப்பொழுதும், எவரையும் இழிவுபடுத்தும் செயலை மனத்தால் கூட நினைக்காமல் இருப்பதே முதன்மையான சிறப்பாகும்.

சாலமன் பாப்பையா உரை:

எவ்வளவு சிறிதாயினும், எவருக்கு என்றாலும், எப்பொழுது ஆனாலும் சரி, மனத்தால் கூடத் தீமையைச் செய்யா திருப்பதே உயர்ந்தது.

மணக்குடவர் உரை:

யாதொன்றாயினும், எல்லா நாளும் யாவர்மாட்டும் இன்னாதவற்றை மனத்தினாலும் செய்யாமை நன்று.

திருக்குறளார் வீ. முனிசாமி உரை:

மனத்தோடு பொருந்திய துன்பம் தரும் செயல்களை எக்காலத்திலும், யார்க்கும் சிறிதேயாயினும் செய்யாதிருத்தல் தலையான அறமாகும்.

Transliteration:

enaiththaanum eGnGnaandrum yaarkkum manaththaanaam
maaNaasey yaamai thalai

Translation:

To work no wilful woe, in any wise, through all the days,
To any living soul, is virtue’s highest praise.

Explanation:

It is the chief of all virtues not knowingly to do any person evil, even in the lowest degree, and at any time.